"Кумтөрдүн" аймагынан жалпы 70 миллион метр куб мөңгү талкаланган

"Кумтөр" кенинин аймагынан бүгүнкү күнгө чейин жалпы 70 миллион метр куб мөңгү талкаланган. Маалыматты парламенттин 26-февралдагы жыйынында өкмөт өкүлдөрү билдиришти. "2012-жылы түзүлгөн комиссиянын чечимине таянсак, 70 миллион метр куб муз алынды. Көз карандысыз эксперттердин чечими боюнча, жалпы 430 миллион метр куб муз ордунан жылган",- деди өкмөт өкүлү.

Депутаттардын "Талкаланган муздардын айынан мамлекетке канча зыян келтирилди?" деген суроосуна жооп бере алышкан жок. Буга чейин депутат Өмүрбек Текебаев: "Буга чейин экологиялык чыгымдарды, анын ичинде мөңгүнүн эришин эсептеп чыгуу механизми болгон эмес. Биздин фракция механизмдерди иштеп чыккыла деп Токой чарба жана айлана-чөйрөнү коргоо агенттигине тапшырма берген. Бирок эки барак механизмди иштеп чыга албай койду эле, депутат Эркингүл Иманкожоева даярдап чыкты",- деп билдирген.

Автор: Нургазы Аматов