Ош облусунун казысы илим сабаты жетиштүү болбогон имамдарды окуу курсуна барууга милдеттендирди

Ош облусунун казысы Ноокат районундагы мечиттерде жума намазын окуй турган имамдар менен жолугушту. Бул тууралуу бүгүн, 30-мартта Ош облустук казыятынан билдиришти. Маалыматка ылайык, жолугушууга Ноокат районунун башкы имам-хатиби Маматкасым Турдубаев жана казыяттын кызматкерлери катышышты. Чогулуштун жүрүшүндө Ош облусунун казысы Ниязали ажы Арипов имам-хатибдерге мазхаб кармоонун зарылчылыгы боюнча түшүндүрмө берип, матрудия ишеним акыйдасынын чегинде иш алып барууга чакырды. Илим сабаты жетишерлик деңгээлде эмес имам-хатибдерди окуу курстарына катышууну милдеттендирди. Мындан сырткары жыйында даават иштери, намаз убакыттары боюнча айтылган пикирлерге тиешелүү жооптор берилди.

Жыйындын сонунда казы жашы улуу, 15-20 жылдан бери имамдык кызматты аркалап эмгеги сиңген аксакалдарга казыяттын атынан китептерди тапшырды. Эскерте кетсек, аталган жыйынга Ноокат районунун 39 жума окулган мечитинин имам-хатибдери катышышты.

Автор: Наргиза Бекжанова
Фото: Ош облустук казыятыныкы