Кыргыз жергесинде 47 миң адам кант диабети менен ооруйт

КРнын Диабетикалык жана эндокринологиялык ассоциациясынын маалыматына ылайык, былтыр 47 миң адам кант диабети менен катталган. Алардын 12 миңине инсулин дарысы керек. Маалым болгондой, учурда өлкөдө 300 наристе кант диабети илдети менен каттоого туруп, алардын үчтөн бир бөлүгү Бишкек шаарында жашашат. Бул тууралуу КРнын Саламаттыкты сактоо министрлигинен билдиришти.

25-апрелде “Эң мыкты бала бакча” деп аталган кант диабети менен ооруган балдардын мекемесин саламаттыкты сактоо министри Талантбек Батыралиев көрүп чыкты. Жолугушууда бала бакчанын директору жана кант диабети менен ооруган баланын апасы Нурхан Жумабаева: “Өлкөдө бул ооруга кабылган адамдардын жашы жыл сайын жашарууда. Наристелерге сапаттуу инсулин дарысы керек, анан эндокринолог адистери өлкөдө жетишсиз”,- деди.

Буга байланыштуу министр балдардын ден соолугу ал үчүн жана министрлик үчүн биринчи орунда экендигин билдирди.

Автор: Наргиза Бекжанова
Фото: Саламаттыкты сактоо министрлигинин басма сөз кызматы