Ош. Пан Ги Мундун жубайы Пан Сун Дек Сулайман-Тоо менен таанышты

Ош шаарына келген Бириккен Улуттар Уюмунун Башкы катчысы Пан Ги Мундун жубайы Пан Сун Дек 11-июнда Юнесконун ыйык мурастар тизмесине кирген Сулайман-Тоо менен таанышты. Бул тууралуу шаардык мэриянын басма сөз кызматынан билдиришти.

Алгач коноктор ыйык тоонун ортосунда жайгашкан “Үңкүр” музейине барып, “Ош шаары кечээ жана бүгүн” аттуу сүрөт көргөзмөсүнө катышты. Андан соң аталган музейде сакталып турган кыргыздардын улуттук кийимдери, турмуш-тиричиликке пайдалануучу буюмдары менен таанышты.

Ага улай эле келген меймандар үчүн шаар жаштары тарабынан даярдалган концерттик программа, кыз ала качуунун терс көрүнүштөрүн чагылдыган эпизод көрсөтүлдү. Пан Сун Дек айым эпизодду чагылдырган жаштар таланттуу экенин баса белгилеп, аларга терең ыраазычылыгын айтты.

Соңунда Пан Сун Дек айым “Сулайман-Тоо” археологиялык музейинин "Ардактуу атуул" китепчесине “Кыргыз өлкөсүнө жасаган бул иш сапарымда Кыргыз Республикасы жана кыргыз мамлекетинин маданияты тууралуу көптөгөн жакшы нерселерди үйрөндүм. Мындан ары кыргыз жерине бардык жакшылыктарды каалайм” деген кол жазмасын калтырды.

Даражасы улуу уюмдан келген расмий конокторду КРнын Билим берүү жана илим министри Эльвира Сариева коштоп жүрдү.

Автор: Айпери Ганыжан кызы