Өлкөдө алгачкы беш жарым айда жол кырсыгынан 34 бала каза болуп, 622 бала жаракат алган

Өлкөдө алгачкы беш жарым айда жол кырсыгынан 34 бала каза болуп, 622 жашы жете элек бала жаракат алган. Бул тууралуу бүгүн, 18-июнда “Балдар, абайлагыла!” аттуу акциянын жүрүшүндө ИИМдин Жол-кайгуул кызматынын борбордук аппаратынын жетекчиси Өткүр Умаров билдирди. Анын айтымында, республика боюнча 5 ай 16 күндө балдардын катышуусу менен жалпысынан 554 жол кырсыгы катталган.

“Урматтуу ата-энелер, балдарыңыздарга жолдо өзүн алып жүрүү эрежелерин үйрөтүүнү ананкыга калтырбагыла. Бул нерседен сиздердин наристеңиздердин ден соолугу жана өмүрү көз каранды”,- дейт Умаров.

Айта кетсек, бүгүн Бишкекте “Балдар, абайлагыла!” аталышындагы 1 айлык акциянын алкагында веложүрүш өттү. Ага Чүй облусунун жана Бишкек шаарынын мектептеринде 9-10-11-класстарда окуган 60 окуучу катышты. Иш-чара жай айы келип, балдардын унаа өтүүчү жолдорго чыкканы көбөйгөндүгүнө байланыштуу айдоочуларга жолдо жүрүү эрежесин сактап, байкап айдоону эскертүү иретинде өткөрүлдү. Мындай веложүрүш республика боюнча жүргүзүлөрү айтылып, кезек Ысык-Көл облусуна берилди.