Ак-Тоо чокусунда каза тапкан испаниялык альпинисттердин өздүгү аныкталып, өлүк сактоочу жайга жеткирилди

Чет элдик маалымат булактары кар көчкүнүн курмандыктары дал ушул 3 адам экенин жазып жатышат.

21-июнда Ак-Тоо чокусундагы Ак-Сай музуна чыккан испаниялык альпинисттерден турган топтун 3 мүчөсү каза тапканы тууралуу маалымат тараган. Буга кар көчкү себеп болгон. Өзгөчө кырдаалдар министрлиги бул окуя боюнча бүгүн, 23-июнда билдирүү жасап, окуяны тастыктады.

Маалым болгондой, 21-июнда саат 15:00дө КРнын Альпинизм федерациясынын (топтун жетекчиси Олег Тураев) кайрылуусу боюнча “Тянь-Шань Тревел” фирмасы маркумдардын сөөгүн издөө-куткаруу боюнча иштерди уюштурган. Натыйжада 22-июнда саат 13:28де маркумдардын сөөктөрү атайын тик учак менен Бишкек шаарынын “Рамадан” (маркумдарды жерге берүү уюму) өлүк сактоочу жайына жеткирилген.

Каза болгондор:

1. Алехандро Васедо Чафер, Валенсия шаарынын тургуну, туулган жылы белгисиз;

2. Родригес Виллар (аял киши), 1996-жылы туулган, Таррагона шаарынын тургуну;

3. Жозеф Катрино Кабалерия, 1991-жылы туулган, Жерона шаарынын тургуну.

“Казакстан Республикасындагы Испаниянын консулдугу окуя тууралуу маалыматты билет. Жогорудагы кырсык боюнча Кыргыз Республикасынын Өзгөчө кырдаалдар министрлигине эч ким жардам сурап кайрылган эмес”,- деп жазылат маалыматта.

Автор: Максат Кудайбердиев