Баткенде сел жүрүп, ички чарбалык жолдорду бузуп кетти

Баткен районундагы Кыштут айыл аймагында 30-июнда катуу жааган жамгырдын кесепетинен сел жүргөн.
Сел Кыштут айыл аймагындагы Согмент айылынын Долто-Сай тилкесиндеги сай аркылуу агып өтүп, сайдан ашкан селдин суусу 3 турак үйдүн короо-жайларына кирген.
Чарбак, Согмент айылдарынын ортосундагы ички чарбалык автоунаа жолун сел жууп, жеңил автоунаалардын жүрүүсүнө кыйынчылык жаратууда. Селден адамдарга, турак үйлөргө жана малга зыян келген эмес.

Баткен районундагы Дара айыл аймагында жүргөн сел Баткен-Кайыңды автоунаа жолунун Тунук-Суу айылы аркылуу өткөн жерин каптап кеткен. Сары-Талаа айылы менен Жаңырык айылдарынын ортосундагы ички чарбалык жолдорду жана Жаңырык айылынан Кайыңды айылына чейинки жолдорду сел жараксыз кылып, азыркы учурда автоунаалар үчүн жол каттамы жок. Селден адамдарга, турак үйлөргө жана малга зыян келген эмес.

Автор: Айпери Ганыжан кызы