Нарындагы төрөтканада дарыгер жардам бербей коюп көз жумган аял боюнча кылмыш ишин Жогорку Сот карайт

Өткөн жылы Нарын облустук бириктирилген ооруканасынын төрөт бөлүмүндө 39 жаштагы Миргүл Жумалиева көз жумган. Анын жакындары окуядан бир жыл өтсө да күнөөлүү адамдар жоопко тартылбай келгенин айтып чыгышты. Бул боюнча SUPER.KG  порталына бүгүн, 8-июлда Жогорку Соттун басма сөз катчысы Айнура Токтошева: "Айыпталуучу Б.Темирова Нарын шаарынын жана Нарын облусунун судьяларынын айынан жазага тартылбай калган деген маалыматтар чындыкка дал келбейт",- деп билдирди.

Анын айтымында, кечээ, 7-июлда Нарын шаардык сотуна Б.Темированын көзөмөл иретиндеги даттануусу келип түшүп, анын негизинде ага карата кылмыш иши көзөмөл тартибинде кароо үчүн Жогорку Сотко жөнөтүлүүгө даярдалууда. Жогорку Соттун соттук коллегиясы бул кылмыш ишин карап бүткөндөн кийин өзүнүн юридикалык баасын берет.

Маалымат үчүн: Барчынай Темирова (айыпталуучу) Нарын облустук бириктирилген ооруканасынын төрөт бөлүмүнүн башчысы болуп иштеп туруп, 2014-жылдын 16-апрелинде болжол менен саат 18:00дө ичиндеги баласы кыймылдабай жана ичи ооруп жаткандыгын айтып келген 6 айлык боюнда бар М.Жумалиеваны кабыл алган. Анын ичиндеги баласы каза болгондугун аныктап, бирок ал өзүнүн кызматтык милдетин талапка ылайык аткарбай, жабырлануучуну аман алып калууга бардык чараларды көрбөгөндүгүнүн натыйжасында 2014-жылдын 17-апрелинде таңкы саат 06:35 чамасында М.Жумалиева каза болгон.

Бул факт боюнча тергөө органдары тарабынан Б.Темировага кылмыш иши козголгон. Айыпталуучуга карата кылмыш иши сотко окуя болгон күндөн туура бир жыл өткөндө, 2015-жылдын 16-апрелинде келип түшкөн. Ал эми сот отуруму 2015-жылдын 20-апрелине дайындалган. 

Ушул жылдын 15-майындагы Нарын шаардык сотунун бул кылмыш иш боюнча соттук отурумунда айыпталуучу Б.Темирова кылмыштын эскирүү мөөнөтү бүткөндүгүнө байланыштуу жоопкерчиликтен бошотууну суранган. Сотто прокурор Т.Мааткеримов бул өтүнүчкө каршы эместигин билдирип, бирок мөөнөттөрдү текшерүүнү айткан. Шаардык соттун токтому менен айыпталуучу кылмыш-жаза жоопкерчилигинен бошотулуп, эскирүү мөөнөтү өткөндүктөн жазык иши кыскартылган.

Ал эми Нарын облустук сотунун 23-июндагы аныктамасы менен жогоруда аталган Б.Темирова жөнүндөгү Нарын шаардык сотунун 2015-жылдын 15-майындагы токтому жокко чыгарылган. Ошондой эле Темирова Б.Э. күнөөлүү деп табылып, бирок мөөнөтү өтүп кеткендигине байланыштуу жаза жоопкерчилигинен бошотулган.

Иштин жагдайларына караганда, Б.Темирова М.Жумалиеванын каза болуп калуу коркунучу бар экенин баамдап туруп, бирок анын өмүрүн сактап калууга тийиштүү чараларды көргөн эмес.

Кыргыз Республикасынын Кылмыш-жаза кодексинде медициналык кызматкер өзүнүн кесиптик милдетин аткарбагандыгы жабырлануучунун өлүмүнө алып келгендиги каралган. Бул берененин санкциясында 5 жылга чейинки мөөнөткө эркиндигин чектөө, же болбосо 3 жылга чейинки мөөнөткө белгилүү бир кызматты ээлөө же белгилүү бир иш менен алектенүү укугунан ажыратуу менен 5 жылга чейинки мөөнөткө эркиндигинен ажыратуу жазасы каралган.