ИИМ: "Буга чейин соттолгон уюшкан кылмыштуу топтун мүчөлөрү "фермерлердин малын тартып алган" деп шектелип кармалышты"

Акча талап кылып, тоноочулук менен алектенген топтун мүчөлөрү Уюшкан кылмыштуулукка каршы күрөшүү боюнча башкы башкармалыктын кызматкерлери тарабынан кармалышты. Бул тууралуу 10-сентябрда ИИМдин басма сөз кызматы билдирди.

Маалыматка караганда, фермерлерди коркутуп, күч колдонуу менен алардын малын тартып алганга шектелгендер буга чейин сот жообуна тартылышкан.

2015-жылдын апрель айында Чүй районунун Шамшы капчыгайында уюшкан кылмыштуу топтун мүчөлөрү бир
үй-бүлөнүн 13 баш кою менен 4 жылкысын тартып алышкан. Натыйжада 300 миң сомдон ашуун зыян келтирилген.

Учурда кылмыш иши козголуп, шектүү катары 1969-жылы туулган С.Т., 1993-жылы туулган Р.А. кармалды.

Автор: Айпери Ганыжан кызы