Чүй облусунда "3 автоунааны айдап качып кеткен" деген шек менен 18 жаштагы эки бала кармалды

Чүй облусунун Сокулук районунда "3 автоунааны айдап качып кеткен" деген шек менен 18 жаштагы эки бала кармалды. Бул тууралуу бүгүн, 16-сентябрда Чүй ОИИББинен билдиришти.

Маалым болгондой, кылмышка шектүүлөр буга чейин бир топ унаалардын айнектерин сындырып, баалуу буюмдарды уурдап жүрүшкөн деп айыпталышууда. "Алар көбүнчө Шопоков шаарындагы унааларды “тазалап” кетишчү. Муну менен катар 6-9-сентябрь күндөрү Сокулук районунун Шопоков шаарынан жана Гавриловка айылынан БМВ, Мазда-626 жана Опель Кадет үлгүсүндөгү 3 унаа уурдалган.

9-сентябрда келген арыздан кийин ыкчам топ кылмышка шектүүлөрдүн изине түшкөн. Кармалган балдар Чүй облусунун С.Г. жана Д.Д. аттуу тургундары экени аныкталган. Учурда уурдалган унаалар ээлерине кайтарылып, келтирилген чыгымдар эсептелүүдө. Ал эми кылмышка шектүүлөр күнөөлөрүн моюнуна алып, аларга карата "уурдоо" жана "бирөөнүн унаасын мыйзамсыз ээлеп алуу" беренелери боюнча кылмыш иши козголду",- деп билдиришти Чүй милициясынан.

Автор: Наргиза Бекжанова