Кечээ, 15-октябрь күнү Руслан Каралаев деген интернет колдонуучу социалдык түйүндөрдөгү өзүнүн баракчасына Алмамбет Анапияевдин өлүмүнө күбө болгон Гүлжигит Абилазизов менен ИИМдин Уюшкан кылмыштуулукка каршы күрөшүү башкы башкармалыгынын кызматкерлери Мирлан Каниметов жана Таалайбек Мамбетакуновго окшош адамдардын сүрөтүн жарыялаган. Ал сүрөттөр Москва шаарындагы "Домодедово" аэропортундагы видеобайкоо камераларынан кыркылып алынган.
Ички иштер министрлиги интернетке жарыяланган бул сүрөттөр боюнча жооп кайтарды. Мекеменин маалымат кызматынын билдиришинче, ИИМди каралоо максатында кимдир бирөөлөр акыркы убактарда А.Анапияевдин өлүмүнө кайрадан кайрылып, такталбаган
маалыматтарды таратууга абдан аракеттенип жатышат.
"Ички иштер
органдары аталган фактыны тергөөдө Беларусь мамлекетинин укук коргоо органдарына
жардам көрсөтүүгө даяр. Алардын укук коргоо органдарынын Кыргыз Республикасына келип, тергөө иштерин жүргүзүүсүнө да даяр экендигибизди убагында билдиргенбиз.
Учурда социалдык түйүндөргө бул жагдайды кайрадан алып чыгып, А.Анапияевди даңазалоого
багыт алгандар пайда болду. Биз алардын ким экенин билебиз. Өз атын
жашырып чүмбөттөнгөн ал адамдардын ким экендигин, мурда-кийин кайда
иштегендиги, мамлекеттик кызматтарда да иштегендиги белгилүү. Жөн
гана сырттан жалган тон бычып, иштин чыныгы жагдайын билип турса да
билбөөгө аракет жасаган, атайын чагымчылдыкты көздөгөн мамлекетибиздин жараны
экендиги белгилүү",- деп айтылат маалыматта.
Ошондой эле ИИМ сүрөттөгү адамдардын ким экендигин таануу мүмкүн эмес экендигин кошумчалады.
"Интернетке жарыяланган сүрөт тууралуу да өз убагында комментарий берип, ИИМдин Уюшкан кылмыштуулукка каршы күрөшүү башкы башкармалыгынын кызматкерлери ал күндөрү Москвада башка максат менен болгондугун айтканбыз.
Министр бул күндөрү иш сапар менен жүргөндүктөн, аталган кызматкерлер
министрдин орун басарынын макулдугу менен Москвага барып келишкен. Алардын бир учакта отуруп калышы биздин кызматкерлер Гүлжигит Абилазизовду коштоп келди дегендикке жатпайт. Ал эми бүгүн интернет
баракчаларына чыгып жаткан сүрөттөрдөн конкреттүү түрдө кимдин ким
экендигин таануу мүмкүн эмес. Ошол себептүү биз дагы бир жолу кайталайбыз, аталган кылмыш ишин Беларустун укук коргоо органдары тергеп
жатат, биз алардын тергөө-иликтөө амалдарына кийлигише
албайбыз.
Ал эми Г.Абилазизов 25-февралда өзүнүн адвокаты менен ИИМге келип Минск шаарында болгон окуяны
болгонун болгондой кылып айтып берген. Ага чейин анын ким экендигин
кызматкерлер билишкен да эмес",- деп айтылат билдирүүдө.
Эске салсак, 18-февралда Беларусь ММКлары Минск шаарындагы көчөлөрдүн биринен белгисиз адамдын мууздалып өлтүрүлгөн жансыз денеси Мерседес унаасынын багажнигинен табылганын жазышкан. Ошондой эле жансыз дененин жанында Анапияевдин сүрөтү чапталган Шакиров Алмазбек Мийзамовичтин атына берилген паспорт да болгон.
Окуя болгон күнү Алманбет Анапияевдин жанында жүргөн Гүлжигит Абилазизов милиция кызматкерлерине 25-февралда көрсөтмө берип, Анапияевдин өлүмүнө шектүү катары бир канча сүрөттүн ичинен экс-президент Курманбек Бакиевдин бир тууганы Жаныш Бакиевдин, ИИМдин Уюшкан кылмыштуу топко каршы күрөшүү башкармалыгынын мурунку башчысы Айбек Абдразаков жана Жаныш Бакиевдин чечен улутундагы жан сакчысы Рустам Сайдуевдин сүрөтүн көрсөткөн.
