"Шайлоо күнү "мектептерде бомба коюлган" деген жалган маалыматты таратты" деп шектелип Чолпон-Атанын экс-мэри кармалды

4-октябрда, Жогорку Кеңештин депутаттарын шайлоо күнү саат 12:26да Бишкек шаардык милициясынын нөөмөт бөлүмүнө белгисиз адам чалып, борбор калаанын орто мектептериндеги беш шайлоо участкасында бомбалар коюлгандыгы жөнүндө маалымдаган. Бул тууралуу бүгүн, 16-октябрда УКМКнын басма сөз кызматы билдирди.

Маалыматка ылайык, шайлоо участкаларына шашылыш түрдө күч түзүмдөрүнүн кызматкерлери чыгышкан. "Укук коргоо органдарынын кызматкерлери шайлоочулардын көңүлүн бурбастан жана калктын арасында дүрбөлөң чыгарбастан ылайыктуу участкалар, анын жайлары жана ага жанаша аймактар текшерилген. Жүргүзүлгөн иш-чаралардын жыйынтыгында кандайдыр бир жардыруучу заттар табылган эмес",- деп билдирет мекеме.

"Бул факт боюнча “террордук акт жөнүндө атайылап жалган билдирүү жасоо” беренеси менен кылмыш иши козголгон. Ыкчам издөө иш-чараларынын жыйынтыгында 15-октябрда аталган кылмышка шектүү катары Маратов Мирлан Ильичевич (1976-жылы туулган) кармалган. Суракта ал шайлоо күнү мас абалында болгонун айтты. Учурда ал камакка отургузулду. Тергөө амалдары уланууда",- деп жазылат маалыматта.

Эскерте кетсек, М.Маратов 2010-жылдан тартып 2013-жылга чейин Чолпон-Ата шаарынын мэринин милдеттерин аткарып келген.

Автор: Нургазы Аматов