№50-СИЗОдон кылмышкерлердин качуусу боюнча ошол убакта түрмөнү жетектеген Имаш Телтаев камакка алынды

Чүй облусунун Төмөнкү-Нооруз айылындагы №50-түзөтүү колониясынын мурунку башчысы Имаш Телтаев камакка алынды. Бул тууралуу бүгүн, 13-ноябрда SUPER.KG порталына ЖАМКтан кабарлашты.

Маалым болгондой, мекемелер аралык комиссиянын сунушу менен тергөө амалдары бүткөнгө чейин Телтаевди камакка алуу чечими чыкты.

Буга чейин 21-октябрда ЖАМКтын башчысы Алик Мамыркуловдун буйругу менен "коом үчүн коркунучтуу кылмышкерлердин түрмөдөн качуусуна жеткирген олуттуу каталарды кетиргени үчүн" деп №50-СИЗОнун бир топ жетекчилери ээлеген кызматтарынан бошотулган.

Эскерте кетсек, 11-октябрдан 12-октябрга караган түнү Чүй облусунун Төмөнкү-Нооруз айылындагы №50-түзөтүү колониясынан 9 кылмышкер абактын кызматкерлерин муунтуп өлтүрүп качып кеткен. Булардын ичинен 5 кылмышкер ошол эле түнү МАИ тарабынан колго түшүрүлгөн.

16-октябрда качкын кылмышкерлердин бири Данияр Кадыралиев түшкө маал Дордой конушунда өлтүрүлгөн. 20-октябрда кылмышкерлердин экинчиси Азамат Мусуралиев Сокулук районунун Арал айылы тараптан жок кылынган.

22-октябрда Чүй облусунун Аламүдүн районундагы Ала-Тоо айыл аймагында Эдил Абдрахманов тирүү кармалган. Ушул эле күнү кечинде Бишкектеги Достук конушунда Алтынбек Итибаев 2 саатка созулган атышуу учурунда ок тийип каза тапкан.

Мындан тышкары аталган абактан качып баратканда кармалгандар: Таалайбек Жуманов, Бакыт Кенжегулов жана Муратбек Жумалиев 21-22-октябрь күндөрү түрмөдө каза болушкан.