Токмоктогу мектептерге жылуулук берилгени менен, окуучулар окуусун башташа элек

Токмоктогу №6, 10, 13-мектептерге жана №2-бала бакчага жылуулук берилгени менен, окуучулар окуусун башташа элек. Бул тууралуу Билим берүү жана илим министрлигинин басма сөз кызматы бүгүн, 24-ноябрда кабарлады.

"Бул мектептер жана бала бакча "Токмок жылуулук" ишканасы "Газпром-Кыргызстан" мекемесине карыз болгону үчүн жылытылбай калган. Райондук билим берүү башкармалыгынын маалыматы боюнча, жылуулук бериле баштады", - деп айтылат маалыматта.

Бирок имараттарда аба ырайы төмөнкү температурада болгону үчүн окуучулар мектепке барыша элек. Санитардык-эпидемиологиялык кызмат менен сүйлөшүүлөр болгон соң балдар окууга келе башташарын кошумчалашкан министрликтен.

Эскерте кетсек, бул маселе боюнча Токмок шаарынын мэриясы так жооп берген эмес.

Автор: Үмүт Абдраимова
Фото: Интернеттен алынды