ЖЫЛНААМА, 24-НОЯБРЬ: 101 жыл мурун дүйнөдөгү алгачкы толук автоматтык пулемётту ойлоп тапкан Хайрем Стивенс Максим каза болгон

Ойлоп табуучу өзү жасаган дүйнөдөгү алгачкы толук автоматтык пулемёттун жанында

1915-жылы 24-ноябрда айтылуу Максим пулемётун жасаган ойлоп табуучу Хайрем Стивенс Максим каза болгон. Ал 1840-жылы 5-февралда АКШнын Мэн штатындагы Сэнгервиле шаарында жарык дүйнөгө келген. Башталгыч мектепти бүтүргөн соң Фитчбург, Бостон жана Нью-Йорк шаарларындагы ишканаларда чиймечи болуп иштеген.

Электротехниканы жакшылап өздөштүрүп, 1877-жылы кесиптеши менен электрдик жарыктандыруу менен алектенген компанияны негиздеген. 1881-жылы Париждеги көргөзмөдө бир нече ойлоп табууларын (анын ичинде электр лампалары жана динамо-унаалары бар) элге тартуулаган.

1881-жылы Англияга көчүп барып, курал жасоо менен алектене баштайт. 1888-жылы кесиптеши Норденфельт менен биргеликте замбирек жана пулемётторду жасап чыгаруучу ишкана ачкан. Конструктордун жасаган куралдары Экинчи дүйнөлүк согуш учурунда колдонулган. Х.Максим мындан тышкары астманы дарылай турган ментол ингаляторун дагы ойлоп тапкан.

24-ноябрга карата жылнаама.

Автор: Саадат Токтоболот кызы