Түндүк-Түштүк альтернативдүү жолунун курулушунун 1-фазасына кошумча 56 миллион доллардан ашуун каражат бөлүнөт

Түндүк-Түштүк альтернативдүү жолунун курулушунун 1-фазасына кошумча дагы 56 миллион 268 миң 44 доллар каражат бөлүнмөкчү. Бул тууралуу Жогорку Кеңештеги "Ата Мекен" фракциясынын жыйынында айтылган. Эскерте кетсек, Жалал-Абад жана Балыкчы шаарларын туташтыруучу курулуп жаткан альтернативдүү жолдун жалпы узундугу 433 чакырымды түзөт, курулушуна 850 миллион доллар жумшалмак.

Баштапкы айтылган каражатка кошумча каражат куруу иштериндеги өзгөртүүлөргө жана жолдун алгачкы долбоорунда каралбаган жагдайларга байланыштуу экенин Түндүк-Түштүк альтернативдүү жолунун курулушунун 1-фазасынын техникалык көзөмөлдөө кызматынын жетекчиси Кубанычбек Ормонов SUPER.KG порталына бүгүн, 21-декабрда билдирди.

Анын айтымында, жолдун курулушу менен чогуу деталдуу долбоор дагы башталган. Дал ушул долбоордун эсеби менен жолдун курулушунун 1-фазасына гана 56 миллион 268 миң 44 доллар кошумча каражат керектелет.

"Техникалык-экономикалык негиздеме боюнча так эмес, болжолдуу эсептөөлөр жүргүзүлөт. Ал эми деталдык долбоор курулуш менен бирге жүргүзүлүп, ага кетчү каражат так эсептелет. Деталдуу долбоор менен алгачкы техникалык-экономикалык негиздеме боюнча эсептер дал келбей калышы мүмкүн. Кээ бир жеринен үнөмдөлсө, кээ бир жеринен кошумча каражат талап кылынат. Мындай ири курулуштарда кошумча каражаттын керектелиши кадимки көрүнүш. Алгачкы түзүлгөн долбоордо каралбай калган жагдайлар иштелип чыккан соң, эсептөөлөр жүргүзүлүп, так сумма айтылат", - дейт жетекчи.

Учурда жолдун эң бийик делген жеринде - Көк-Арт ашуусунда курулуш жүрүп жатат. Аталган ашуу деңиз деңгээлинен 3300-3400 метр бийиктикте болсо, тоннель 2500 метр бийиктикте өтөт.

"Тоннель эки жагынан казылып жатат. Баштапкы долбоор боюнча казылчу жер катуураак болот деп болжолдонгон, тилекке каршы, түштүк тарабында жер жумшак жана суулуу болуп жатат. Андыктан тоннелди бекемдөөдө оорчулук жаралып, убакыт боюнча пландалган мөөнөттөн кеч бүтөт", - дейт
К.Ормонов.

Азырынча курулуштун 1-фазасына 3 өзгөртүү киргизилди:

• Салына турган тоннелдин узундугу буга чейин 3700 метр деп көрсөтүлсө, учурдагы долбоор менен узундугу 3815 метрди түзөт. Себеби тоннелдин башталышы кар көчкү жүрүү коркунучу бар аймакка туура келип калган.
• 1-фазада курула турган жол тилкесинде кар көчкү жүрүү коркунучу бар 5-6 жерге кар галереялары (кардан сактоочу тоннель сыяктуу курулуш) кошо курулат.
• Деталдуу долбоор боюнча тоннелге керектелчү электр энергиясынын көлөмү жогорулаган. Ага байланыштуу буга чейин каралган 10 киловаттык кабелдерге кошумча 35 киловаттыктар да тартылып жатат. Себеби тоннелди бир эле тараптуу эмес, эки тараптуу электр энергиясы, желдетүү системи менен камсыз кылуу зарыл. Ошондой эле тоннелге муз тоңбош үчүн электр жылытуучу жабдуулар да коюлмай болгон.