Кадамжай районунун Марказ айылында "Тез жардам" кызматы түнкүсүн гана иштейт

Саламаттыкты сактоо министрлиги Кадамжай районунун Марказ айылындагы "Тез жардам" кызматына кошумча жумуш орундарын түзбөй жатканын бүгүн, 12-январда SUPER.KG порталына Кадамжай райондук үй-бүлөлүк медициналык борборунун директору Таалайбек Маканов билдирди.

"Марказ айылында "Тез жардам" кызматында 6 адам эки топко бөлүнүп иштейт. Ар бир топто 1 айдоочу, 1 дарыгер, 1 диспетчер эмгектенет. Алар түнкү нөөмөттө гана турушат, кечки 18:00дөн эртең мененки 08:00гө чейин. Ошондо да алар мамлекетке 2 саат ашыкча иштеп берип жатышат. Ал эми күндүзгү чакырууларга үй-бүлөлүк дарыгерлер барышат. Министрликке бир нече жолу кошумча адистерди жумушка алуу боюнча кат аркылуу кайрылганбыз, бирок маселебизди чечип берген жок", - деп билдирди Маканов.

Таалайбек Макановдун маалыматына ылайык, Марказ айылындагы "Тез жардам" кызматы кошумча дагы Көк-Талаа, Иса-Майрам, Арпа-Сай, Сары-Алтын айылдарындагы 20 миңге жакын калкты тейлейт. Учурда аталган айылда 20 миңге жакын калкты тейлеген жалгыз "Тез жардам" унаасы бар.

"Тез жардамда" иштегендерге атайын уюлдук телефон алып бергенбиз. Алардын телефону өчпөйт. Марказ айылындагы "Тез жардам" кызматы 11-январдан 12-январга караган түнү 8 чакыруу болгонун, алардын ичинен 3 адам ооруканага алынып келингенин айтты", - деп кошумчалады Маканов.

Эске салсак, окурман "Элдик кабарга" Кадамжай районунун Марказ айылында "Тез жардам" бөлүмү 24 саат бою иштебей жатканын билдирген.

Автор: Акназар Сулайманкулов
Фото: Окурманга таандык