Алтын жалатылган төш белгилер чырынан улам депутаттарга убактылуу мандаттар берилет. "Дүйнөдө да ушундай кылышат"

2016-жылдын 11-декабрында шайланган жергиликтүү кеңештердин депутаттарына убактылуу мандаттар берилет. Бул тууралуу бүгүн, 12-январда Жогорку Кеңештин жыйынында Борбордук шайлоо комиссиясынын төрайымы Нуржан Шайлдабекова билдирди.

Анын айтымында, депутаттар үчүн төш белгилерди жана ырастамаларды сатып алуу боюнча тендердин жыйынтыгы жокко чыгарылып, соттук иштер жүрүп жатат. "Башкы прокуратура жана мекемелер аралык комиссия кайрадан тендер өткөрүү боюнча сунуш беришти. Мындан тышкары тендерде жеңген компания да сотко кайрылды. Жергиликтүү кеңештердин депутаттарына 1-2 айдан кийин төш белгилери берилиши мүмкүн. Ага чейин аларга убактылуу мандаттар берилет. Дүйнөдө да ушундай кылышат. Бул эл аралык практика", - деди Шайлдабекова.

Эскерте кетсек, 2016-жылдын ноябрь айында Борбордук шайлоо комиссиясы 6,3 миллион сомго жергиликтүү кеңештин депутаттарына алтын жалатылган төш белги жана кызматтык күбөлүк сатып алуу боюнча тендер жарыялаган. Декабрда БШК тендердин жыйынтыгын чыгарып, жаңы 9000 депутаттын төш белгиси жана күбөлүгү үчүн 4,7 миллион сом жумшаларын билдирген эле. Катышуучулардын арасында 9 миң төш белгини 675 миң сомго жасап берүүнү сунуштагандары да болгон, бирок БШК негедир кымбатын тандаган. Тендерге катышкан компаниялар жыйынтыкка макул эместигин билдирип, нааразычылык күчөгөндө БШК жыйынтыкты жокко чыгарууга аргасыз болгон.

Жергиликтүү кеңештин депутаттарын шайлоо 2016-жылдын 11-декабрында өткөн.

Автор: Нургазы Аматов