Тогуз-Торо районуна барчу негизги жол убактылуу жабылды

Тогуз-Торо районуна барчу негизги жол убактылуу жабылды. Бул тууралуу бүгүн, 20-февралда Өзгөчө кырдаалдар министрлигинен билдиришти.

Маалыматка караганда, 19-февраль күнү саат 05:06 чамасында Казарман-Акталчат унаа жолунун 44-45-чакырымында болжол менен 2000 метр куб жана 84-чакырымында эки жеринен жалпысынан 300 метр куб кар көчкү жүрүп жол каттамы жабылып калган. Ошол эле күнү саат 15:00дө №18-жол тейлөө ишканасынан 2 даана бульдозер тартылып, кар көчкү түшкөн жерлер тазаланган. Азыркы тапта кар күрткүдөн тазалоо иштерин жүрүүдө.

Мындан улам Ак-Талаа районунун Ак-Кыя айылында Жарандык коргонуунун коомдук тартипти сактоо кызматы тарабынан пост уюштурулуп, жүргүнчүлөргө түшүндүрүү иштери жүргүзүлүүдө. Жол каттамы убактылуу жабык. Аталган айылда жүргүнчүлөр жана айдоочулар үчүн жылынуу жана тамактануу пункттары уюштурулган.

Автор: Бекжан Рыскулов