Чүй облусунун кыргыз-казак чек арасындагы "Токмок-автожол" көзөмөл өткөрмө бекети модернизацияланып, ишке кирди

Кыргыз Республикасынын Чүй облусундагы кыргыз-казак чек ара тилкесиндеги "Токмок-автожол" көзөмөл өткөрмө бекети модернизацияланып бүгүн, 23-мартта пайдаланууга тапшырылды. Ачылыш аземине Сооронбай Жээнбеков катышты. Бул тууралуу өкмөттүн басма сөз кызматы билдирди.

Маалыматка караганда көзөмөл-өткөрмө бекети суткасына 700 автоунааны жана 5000ге жакын жаранды өткөрүүгө эсептелген.

Премьер-министр Сооронбай Жээнбеков Кыргыз мамлекети ЕАЭБге киришинде мыйзамдык базаны жакшыртууга көңүл бурулуп, инфраструктуралык долбоорлорго тиешелүү деңгээлде көңүл бурулбай калганын белгиледи. Анын жыйынтыгында дыйкан-фермерлер жана ишкерлер, республикадагы экспортёрлор кыйынчылыктарга жана ыңгайсыздыктарга туш болушканын кошумчалады.

"Токмок-автожол" көзөмөл өткөрүү бекети ЕАЭБ талаптарынын алкагында жаңыланганына басым жасап, жакын арада кыргыз-казак мамлекеттик чек арасында жайгашкан "Кең-Булуң-автожол" өткөрүү пункту да пайдаланууга берилерин айтты.

Автор: Айпери Ганыжан кызы