Сузак районунда жер көчкү түшүү коркунучу бар аймактардан 540 адам коопсуз жайларга көчүрүлдү

Сузак районунда жер көчкү түшүү коркунучу жаралууда. Бул тууралуу бүгүн, 30-мартта SUPER.KG порталына Сузак районунун акими Абдимуктар Маматов билдирди.

"Сузак районунун Кыз-Көл, Кызыл-Туу, Көк-Арт, Таш-Булак айыл аймактарында жер көчкү түшүү коркунучтары жогору. Ал аймактардагы жашоочуларды коопсуз жайларга көчүрүү аракети көрүлүп жатат. Буга чейин Көк-Арт айыл аймагынан 17, Кыз-Көлдөн 19 адам, Кызыл-Туудан 300дөн ашуун адам көчүрүлдү. Бүгүнкү күнгө чейин жер жерлерден жалпысынан 540 адам коопсуз жайларга көчүрүлдү. Алдыда Таш-Булак айыл аймагынан дагы 30дай адамды коопсуз аймакка көчүрүү аракети көрүлөт", - деп билдирди район акими.

Маалыматка ылайык, 2017-жылдын жаз айларынан бери Сузак районунда орто жана аз көлөмдүү 20дай жер көчкү түшкөн.

Эске салсак, буга чейин район аймагында бир нече жолу жер көчкү түшүү коркунучу жаралганы айтылган.

Автор: Акназар Сулайманкулов
Фото: Гүлзада Төрөбекова