Өзгөн районунун Заргер айылында жер көчкү алдында калгандардын баарынын жансыз денелери табылды

Өзгөн районунун Заргер айыл аймагынын Ничке-Сай айылында жер көчкүнүн алдында калгандардын баарынын жансыз денелери табылды. Бул тууралуу бүгүн, 31-мартта Өзгөчө кырдаалдар министрлигинин басма сөз кызматынан билдиришти.

Маалыматка ылайык, атайын куткаруучулар тобу кырсык болгон аймактан саат 13:40тар чамасында 1 адамдын жансыз денесин таап чыгышкан. Ал эми саат 14:00дөр чамасында дагы 3 адамдын сөөгү табылган. Маркумдардын өздүгү такталууда.

Эскерте кетсек, 26-мартта аталган айылда көлөмү 500 миң метр куб, узундугу 800, туурасы 120, бийиктиги 8 метрге жеткен жер көчкү жүрүп, 4 үйдү басып калган. Үйлөрдүн биринде 1989-жылы туулган Өмүрзак Эгемкулов аялы жана 4 баласы менен бирге жашачу. Калган турак үйлөрдө эч ким жашачу эмес. Жер көчкү алдында калган үй-бүлөнүн эки баласынын сөөгү кечээ, 29-мартта табылганын эске салабыз.