Коррупцияга каршы митингдерди уюштурган Алексей Навальныйга Москвада белгисиз адам зелёнка чачып кетти

Коррупцияга каршы митингдерди уюштурган Алексей Навальныйга Москвада белгисиз адам зелёнка чачып кетти. Окуя Коррупцияга каршы күрөшүү фондунун кеңсесинин алдында, Навальный Global Event Forum'га катышуу үчүн бараткан маалда болгон. Бул тууралуу оппозициялык саясатчынын басма сөз катчысы Кира Ярмыш билдирген.

Маалым болгондой, кол салуудан кийин оппозиционер ооруканага жеткирилип – зелёнка анын көзүнө кирип кеткен. Ага "оң көзү химиялык күйүк алган" деген диагноз коюлду.

"Учурда анын көзү көрүп, бирок ооруп жатат. Азырынча мунун эмнеге алып келе тургандыгы түшүнүксүз. Полиция арызыбызды кабыл алды, бирок видеокөзөмөл камераларындагы жазууларды алууга ашыгышкан жок. Биз кылмыш ишинин козголушун жана тергөөнү талап кылабыз", - деп билдирди Навальныйдын шайлоо алдындагы штабынын башчысы Леонид Волков.

Мартта Барнаулда Навальныйдын шайлоо алдындагы штабынын ачылышы болуп жатканда дагы ага зелёнка чачып кетишкен. Анда кол салууга карабастан саясатчы тарапташтарынын алдына чыгып сүйлөгөн.

Алексей Навальный 2018-жылы президенттик шайлоого катышууга ниеттенүүдө. Анын талапкерлигин 400 миңден ашык орусиялык колдоду. Бүгүнкү күнгө карата өлкө боюнча жалпысынан саясатчынын 25 шайлоо алдындагы штабдары ачылды.

Айта кетсек, март айында Навальный тарабынан негизделген Коррупцияга каршы күрөшүү фонду өкмөт башчы Дмитрий Медведевдин декларацияда көрсөтүлбөгөн кыймылсыз мүлктөрү тууралуу иликтөөсүн жарыялаган. Андан соң Орусиянын бардык аймактарында коррупцияга каршы митинг өткөн.

Автор: Айпери Ганыжан кызы