Жарандык активист Ак Үйдүн тегерегиндеги бак-дарактар сугарылып, калганы сугарылбай турганын айтты

Жарандык активист Калича Умуралиева Бишкек шаарынын бак-дарактарынын 70 пайызы сугарылбай турганын айтты. Бул тууралуу ал бүгүн, 27-июнда Жогорку Кеңештин тармактык комитетинде билдирди.

Анын айтымында, шаардагы дарактардын 30 пайызы гана сугарылат.

“Ак Үйдүн, шаардын борбордук бөлүгүндө жайгашкан гана дарактары сугарылат. Ошондуктан бактардын жалбырактары саргайып жатат”, - деди ал.

Жашылдандыруу ишканасынын башкы агроному Элнура Жолдошева саргайган бак-дарактардын жалбырагын зыянкечтер жеп жатканын айтты. Ал саргайган дарактарды ийне саюу ыкмасы менен дарылоо пландалып жатканын билдирди.

Комитетте Бишкек шаарындагы дарактардын массалык түрдө кыйылышы жөнүндө маселе каралды.

Автор: Жылдыз Джускембаева