Алмазбек Атамбаев Нурсултан Назарбаевди 77 жашка чыгышы менен куттуктады

Президент Алмазбек Атамбаев Казакстандын президенти Нурсултан Назарбаевди туулган күнү менен куттуктады. Бул тууралуу президенттин басма сөз кызматы билдирди.

“Боордош Казакстандын ийгиликтери, социалдык-экономикалык жетишкендиктери же дүйнөлүк деңгээлдеги долбоорлорду ишке ашыруу жана эл аралык аренадагы өлкөнүн кадыр-баркын бекемдөөдө болобу, мунун баары сиз жүргүзүп жаткан көрөгөч саясаттын көрүнүктүү жыйынтыктары. Сиздин кесиптик жана турмуштук бай тажрыйбаңыз дайыма Казакстан элинин колдоосуна татыктуу болгон”, - деп жазылат куттуктоодо.

Ошондой эле Атамбаев тең укуктуу жана өз ара пайдалуу кызматташууга негизделген достуктун, жакшы коңшулаштыктын жана стратегиялык өнөктөштүктүн кыргыз-казак мамилелери эки өлкөнүн элдеринин кызыкчылыгында мындан ары дагы чыңдалып жана өнүгө берерине ишене турганын билдирген.

Нурсултан Назарбаев бүгүн, 6-июлда 77 жашка толду. Ал Казакстанды 1991-жылдан бери башкарууда.

Автор: Жамалидин Парманкулов
Фото: Интернеттен алынды