2016-жылы Кыргыз Республикасынын президенти Алмазбек Атамбаев 1 миллион 246 миң сом киреше тапса, чыгашасы 8 миллион 385 миң сомду түзгөнү Мамлекеттик кадр кызматынын расмий сайтында жарыяланды. Президент өзү белгилегендей чыгаша өзүнүн топтогон каражатынан алынган.
Ошондой эле документте 116 чарчы метр курулушу менен 2,7 гектар жана бак-дарактуу 6,4 гектар жерге ээ экени көрсөтүлгөн. Ал эми ошол эле документе ылайык, президенттин унаасы жок. Анын жакын тууганы 2016-жылы иштеген жеринен 250 миң сом тапса, үлүштүк кирешеден 369 миң сом, жарандык-укуктук келишимдерден 2,5 миллион сом, пайыздык төлөмдөн 100 миң сом тапканы маалымдалат.