Жалпак-Таштагы жер көчкүдөн жабыркаган 75 үй-бүлөгө үйлөр курула баштады

Ош облусуна караштуу Өзгөн районунун Жалпак-Таш айыл аймагындагы жер көчкүдөн жабыр тарткан 75 үй-бүлөгө үйлөрдүн пайдубалдары курулууда. "Учурда 40тан ашык үйдүн пайдубалы курулуп бүттү", - деп маалымдады бүгүн, 13-июлда райондук администрация тарабынан түзүлгөн штабдын өкүлдөрү SUPER.KG порталына.

Ушул жылдын апрель айында жер көчкү Курбу-Таш айылы менен Маркс айылындагы 75 үй-бүлөнүн турак жайын басып калган. Жабыркаган үй-бүлөлөргө Кызыл-Октябрь жана Кароол айылдарынан жер тилкелери бөлүнүп берилген.

"Учурда электр линиялары тартылып, арыктарга насостук станциядан канал аркылуу суу берилген. Трансформатор орнотулуп свет берилди. Таза суу траншеялары казылып, 13-июлдан тартып суу түтүктөрү коюла баштады. Райондогу ишкана-мекемелердин тиешелүү кызматкерлери ар бир үйдүн курулушун көзөмөлгө алууда. Элдин маанайы жакшы", - дейт штабдын өкүлдөрү.

Автор: Кызжибек Раимова
Фото: Акмат Раманкулов