Өзгөчө кырдаалдар министрлигинин кызмат адамдарына кылмыш иши козголду

Өзгөчө кырдаалдар министрлигинин кызмат адамдарына кылмыш иши козголду. Бул тууралуу бүгүн, 28-сентябрда Башкы прокуратурадан билдиришти.

Маалыматка караганда, ӨКМнын сатып алуулар бөлүмүнүн кызмат адамдары дизелдик күйүүчү майды жеткирүү боюнча тендерде "Э" ишканасын жеңүүчү деп тапкан. Бирок белгисиз себептерден улам күйүүчү майды жеткирүү боюнча арзан баа сунуштаган ишканалардын арызы каралган эмес. Мындан улам күйүүчү майды жеткирүү иштери жогорулатылган баада аткарылган.

Андан сырткары келишимде көрсөтүлбөстөн ӨКМ тарабынан кошумча 8 миллион сом которулган. Анын 5 миллион 295 миң сомуна гана күйүүчү май жеткирилген.

"Жогорудагы фактылар боюнча ӨКМнын кызматкерлерине "кызмат абалынан кыянаттык менен пайдалануу", "өлкө кызыкчылыгына каршы келишим түзүү" беренелери боюнча кылмыш иши козголду. Ал эми "Э" ишканасынын кызматкерлерине "кызмат абалынан кыянаттык менен пайдаланууга катышуу" жана "алдамчылык" боюнча кылмыш иши козголду", - деп айтылат Башкы көзөмөл органдын айтымында.

Автор: Бекжан Рыскулов