Лас-Вегаста белгисиз адам жарандарга ок чыгарып кеминде 20дай адам каза болду

Лас-Вегастагы Mandalay Bay аталышындагы оюн-зоок комплексинин алдында белгисиз адам жарандарга ок чыгарды. Жыйынтыгында 20га жакын киши каза болуп, 100дөй адам түрдүү жаракаттарды алгандыгын жергиликтүү маалымат булактары жазды.

Күбөлөрдүн айтымында, жабыркаган адамдардын көпчүлүгү мейманкананын маңдайында ойнолуп жаткан кантри-музыканы укканы келгендер. Ал эми белгисиз адам аларга каршы турган мейманкананын балконунан ок чыгарган.

"Ал 32-кабаттан туруп аткан. Жалпы жонунан жүзгө жакын ок атылган. Жаракат алгандарды ооруканага алып кетишти. Такталбаган маалыматтар боюнча, ок чыгарган адам Самюэль Хайд аттуу киши болушу ыктымал. Ал ошол жерден эле полиция тарабынан атып өлтүрүлгөн. Анын жанындагы Марилу Дэнли аттуу азиат улутундагы адам изделүүдө", - деп жазылат маалыматтарда.

Ок атылган аймактан адамдарды коопсуз жайга убактылуу көчүрүү иштери жүрдү. Окуя болгон жерге жакын аймакта эл аралык "Мак-Карран" аэропорту жайгашкан. Аба майданынын кызматынан пайдалануучу жүргүнчүлөрдү коопсуз аймактарга жөнөтүп, каттамдар убактылуу токтотулду. Мындай кадам полиция кызматына да көмөкчү болуп, изделип жаткан шектүүнүн башка өлкөгө чыгып кетүү аракетине бөгөт коймокчу.