27-декабрда жааган кар бардык тармакты бир топ эле убарага салды. Шаар тургундары бир гана борбордук көчөлөрдөгү карды тазалашпай, жөө адамдар басуучу аллеяларды деле кардан тазалап коюшпайт деп "Тазалыкка" нааразы.
Кар жааганына 3 күн болду. Дароо тазаланбаган карды күндүзү тийген күн эритип, муздак абага кайра тоңгондо, аппак кар көпкөк музга айланды. Саламаттыкты сактоо министрлиги кардын жаашы бир гана муниципалдык мекеменин кызматкерлерин эмес, медицина кызматкерлерин да түйшүккө салды дейт.
Бишкекке кар түшкөн күнү медицина кызматкерлерине 50дөн ашык адам ар түрдүү травмалар менен кайрылышса, алардын 21и тайгаланып жыгылып жаракат алгандар болгон.
Жолдор тайгалак болгон учурда кантип абай салуу керек?
- Этияттык жана жолго көңүл коюу тайгаланып жыгылуунун алдын алат.
- Тайгалак жолдордон басып баратканда шашпай басуу керек жана чукул кыймыл-аракет жасоодон качуу кажет.
- Буттарды эркин койбой, тизелерди азыраак бүгүп, ал эми тулку бойду бир аз алдыга багыттоо керек.
- Көнүп алгандай 2 колду чөнтөккө салып басуу кооптуу. Тайгаланып кеткен учурда колду чөнтөктөн чыгарууга жетишпей калышыңыз ыктымал. Колдор эркин болгондо тең салмактуулукту кармоо оңой болот. Кайсы тарапка жыгылып баратсаңыз, колдор рефлекс менен иштеп, дароо карама-каршы тарапка тулкуну багыттоого шарт түзмөкчү.
- Унаалар каттаган трассанын жээги менен эч качан баспаңыз. Бул өтө кооптуу! Ошол эле учурда имараттардын түбүнө да жакын басуудан качыңыз. Кардын эришинен муздар чатырларда тоңуп калган учур. Ошондой эле күндүзү күн тийип, кардын чатырдан шыпырылып түшүшүн шарттоодо. Башыңызга түшпөйт деген кепилдик жок.
- Жолду кесип өтүүдө бир гана жөө адамдар өтүүчү өтмөктөн өтүңүз. Унаалардын баарынын эле айдоочулары дөңгөлөктөрүн кышкыга алмаштырган эмес. Тормоз тепкен күндө да тайгаланып келип сүзүп кетиши толук мүмкүн.
- Эң коркунучтуу жерлер шаар ичиндеги имараттардын жана өйдөлүш-жапыз жерлерге салынган тепкичтер. Эгер тепкичтен түшүп бараткан болсоңуз, капталыңыздан болуп, тепкичти узатасынан басыңыз. Кокусунан жыгылып баратсаңыз, бул учурда тең салмактуулукту сактоого мүмкүн.
- Кышкы бут кийим жылуу эле эмес, ыңгайлуу жана таманы тайгалак болбошу керек. Эгерде андай болуп калса бут кийимдин таманын кургата сүрүп, кадимки чүпүрөк изолентаны же медициналык лейкопластырь чаптап коюу керек. Бийик такалуу бут кийимдер да тайгалакта кооптуу.
Эгер тайгаланып кетсеңиз...
Эгер тайгаланып кетсеңиз, жумшагыраак жыгылыш үчүн отура калган пайдалуу. Ошондо жер менен тулкуңуздун аралыгы жакын болуп, жерге катуу тийбейсиз.
Эгер тайгаланып кетсеңиз, анда кайсы жерлерди сактоо керек билип алыңыз. Мисалы, артты көздөй жыгылып баратсаңыз, жерге чычаң менен катуу тийип калыштын алдын алуу керек. Чычаң катуу тийсе анын учу сынып кетиши жана кыр аркага, жүлүнгө доо кетиши мүмкүн. Алдыга жыгылып баратсаңыз, анда кол менен таянып калуу керек. Мында салмак колдорго түшүп, тизе менен катуу урунуу коркунучу азыраак болот. Тизеге караганда алакандан жарака кетпейт.
Эгер тайгаланып кетсеңиз, колдор менен таянганда муштумду түйүп же манжалардын сырты менен таянбаңыз, алакан ачык болуусу керек. Антпесе манжалардын ашташкан жерлери чыгып же сынып кетиши мүмкүн. 
Эгер тайгаланып кетсеңиз, бел, баш, моюн, тизе сыяктуу жерлерди аярлаңыз. Бул жерлер катуу урунса жүлүнгө доо кетип, сөөктөр сынып же жарака пайда болуп, ал эми баш мээ чайкалып калышы мүмкүн. Булчуңдар менен жыгылган күндө деле эт бир аз көгөрүп, убактылуу ооруксунганы менен, жогоруда саналган органдарчалык өтө коркунучтуу эмес.
Эгер тайгаланып кетсеңиз, жыгылуунун натыйжасында денеге олуттуу травма келтирилсе үй шартында дарыланып жата бербей, бейтапканага эле кайрылганыңыз жакшы. Адистер баары бир өз ишин сизден жакшы билишет.
27-декабрда жааган кар бардык тармакты бир топ эле убарага салды. Шаар тургундары бир гана борбордук көчөлөрдөгү карды тазалашпай, жөө адамдар басуучу аллеяларды деле кардан тазалап коюшпайт деп "Тазалыкка" нааразы.
Эгер тайгаланып кетсеңиз, жумшагыраак жыгылыш үчүн отура калган пайдалуу. Ошондо жер менен тулкуңуздун аралыгы жакын болуп, жерге катуу тийбейсиз.
