Жалал-Абад облусундагы Кара-Көл шаарынын тургундары кооптуу абалга карабай, оодарылып кеткен бензовоздон агып жаткан күйүүчү майды канистрларга куюп алышты. Бул тууралуу SUPER.KG порталына окуяга күбө болгон жергиликтүү тургун билдирди.
"DAF үлгүсүндөгү бензовоздун айдоочусу рулду башкара албай, жолдон чыгып оодарылып кеткен. Бензовоздон солярка агып баштады, бирок эл бул кооптуу абалга карабай агып жаткан майды канистр жана башка идиштерге куюп жатышты", - дейт күбө.
Айта кетсек, 16-январь күнү саат 14:29 чамасында Бишкек-Ош унаа жолунун 386-чакырымында DAF үлгүсүндөгү күйүүчү май ташычуу унаа оодарылып кеткен. Унаанын ичинде болжол менен 37 тонна солярка болгон, анын ичинен 1 тоннасы төгүлгөн.
Эске салсак, 2017-жылы Пакистанда күйүүчү май ташыган унаа жол кырсыгына кабылган. Оодарылып калган унаадан адамдар канистрларга бензин агызып алып жатканда жарылуу орун алып 152 адам каза болуп, 117 адам жаракат алган.