Владимир Путин жубайы менен ажырашты

Орусиянын президенти Владимир Путин аялы Людмила Путина менен ажырашты. Бул тууралуу алар "Россия-24" телеканалына берген маегинде жарыялашты. “Биз дайым жакын адамдардан болуп кала беребиз. Владимир Владимировичке ыраазымын, мени азыр деле колдоп жатканына. Акыркы убактарда биз бири-бирибиз менен көрүшпөй деле калганбыз, балдарыбыз чоңойду, айтор, ар ким өз жашоосу менен алек болуп калган. Ажырашуу экөөбүздүн тең чечимибиз, никебиз бүттү. Биз цивилизациялуу жол менен ажыраштык”,- деди Людмила Путина. Ал эми Орусиянын мамлекет башчысы: “Бул биздин жалпы чечимибиз. Менин ишмердигим, жумушум түздөн түз эл алдына болууга байланышкан. Бул бирөөгө жакса, кимдир бирөөгө жакпайт. Людмила Александровна андайды жактырбайт. Ал 9 жыл жоопкерчиликтүү милдетти аткарды”,- деди.

Ал эми балдары тууралуу Путин: "Алар Орусиядан билим алышты жана такай Орусияда жашашат",- десе, Людмила Путина "Биз балдарыбызды сүйөбүз, алар менен сыймыктанабыз жана ар дайым көрүшүп турабыз",- деди. Белгилей кетсек, Владимир Путин менен Людмила Шкребнева 1983-жылы баш кошкон. Экөөнүн 1985-жылы туулган Мария жана 1986-жылы туулган Екатерина аттуу 2 кызы бар. Ошондой эле массалык маалымат каражаттарында буга чейин Путин менен Мамлекеттик Думанын депутаты, 30 жаштагы Алина Кабаеванын жакын мамилеси бар экендиги тууралуу айтылып келген.