Каныбек Иманалиев: "Талантбек Исаев менен кафеден тамактанып жатканда столдун астынан диктофон табылды"

"Талантбек Исаев менен кафеден тамактанып жатканда столдун астынан диктофон табылды", - деп бүгүн, 8-февралда SUPER.KG порталына "Ата Мекен" фракциясынан депутат Каныбек Иманалиев билдирди.

Анын айтымында, кечээ, 7-февралда саат 13:00 чамасында ИИМдин Күзөт башкармалыгынын мурдагы башчысы Талантбек Исаев жана парапсихолог Мелис Карыбеков үчөө кафеде тамактанып жатканда диктофон таап алышкан. "Биз тамактанып кетели деп жатсак столдун астынан кичинекей диктофонду таап алдык. Мындай нерсени кимдер уюштурганын так айтуу кыйын", - дейт эл өкүлү.

Эске салсак, Талантбек Исаев "бийликти күч менен басып алууга аракеттенген" деген шек менен камакка алынган Жогорку Кеңештин депутаты Канат Исаевдин бир тууган агасы. Ал Канат Исаев камакка алынгандан кийин ИИМдин Күзөт башкармалыгынын жетекчилик кызматынан кетүү тууралуу арызын жазган. Анын арызын премьер-министр Сапар Исаков канааттандырган.

Автор: Жылдыз Джускембаева