Кечээ, 7-февраль күнү Бишкек шаарынын кинотеатрларынын биринде убагында чуу жараткан “Грей мырзанын 50 кыры” тасмасынын уландысы тар чөйрөгө көрсөтүлдү. Ал эми бүгүн мына ошол тасманын “Эркиндиктин 50 кыры” деп аталган 3-бөлүгү жалпы коомчулуктун назарына коюлат.
Грейдин ролу аягына чейин Жейми Дорманда калды
Эротикалык бестселлер “Грей мырзанын 50 кыры” тасмасы соңку 3 жылда талкуу чордонунан түшпөй келет. Кинонун биринчи бөлүгүндө өзүн жана өнөктөшүн кыйнап төшөк кумарынан ырахат алган Кристиан Грейдин жоруктары ачык эпизоддордо көрсөтүлгөнү үчүн көпчүлүк төшөк мамилеси жумшактыкты, назиктикти сүйөт, кинодо баш каарман “садомозахист” катары көрсөтүлгөн деп сындашкан. Тасманын "Караңгылыктын 50 кыры" деп аталган экинчи бөлүгүндө кино жаратуучулар айтылган сындардан туура жыйынтык чыгарышкан өңдүү. Себеби Грей Анастейша Стилди мурункудай ырахат алуучу курал катары гана көрбөй, өнөктөшүнө карата сүйүүсү, аёо сезими ойгонот. “Күүгүм” жана “Гарри Поттер” чыгармаларын артка таштап, 30 миллиондон ашуун нуска менен рекорд койгон “Грей мырзанын 50 кыры” чыгармасынын экрандаштырылган версиясын көпчүлүк киносынчылар чыгармадан да кызыктуу болгон дешет. Фильмдин үчүнчү бөлүгүндө Грейдин ролун аткарган актёр Жейми Дорман тартылбайм деп маек берген эле. Бирок актёрдун үчүнчү бөлүгүнө тартылганы тасма тартылып жатканда гана белгилүү болгон. “Грей мырзанын 50 кыры” чыгармасынын автору Эрика Леонард Жеймс Грейдин ролуна Роберт Паттинсонду көргүсү келгенин айткан, бирок тасма жаратуучулар Жейми Дорнандын оюнун жактырып ага токтолушкан.
Аз, бирок саз ачык эпизоддор
Грей мырзанын төшөк сырлары камтылган тасманын үчүнчү бөлүгүндө уяттуу эпизоддор мурунку бөлүмдөрүнө салыштырмалуу аз жана саз болуптур. Анын ордун “Эркиндиктин 50 кыры” тасмасынын сюжетинде юмор, драма, романтика ээлегендей туюлду. Кызыл түстөгү оюн бөлмөсүндө өзгөчө төшөк ыкмаларын колдонгон түгөйлөр миллиардер Кристиан Грей менен журналист Анастейша Стил баш кошуп, көп узабай Анастейша кош бойлуу болот. Жубайынын кош бойлуу экенин Грей маанайы суз кабыл алат. Анткени ал мындай кабыл алуусун “ата болууга даяр эмесмин, сага жер кезип дүйнөнү көрсөткүм келет, сенин сүйүүңдү эч ким менен бөлүшкүм келбейт” деп түшүндүрөт. Тасмада түгөйлөрдүн бири-бирине болгон таттуу мамилесин, ысык төшөк кумарын, Анастейшанын ылдамдыкты сүйөрүн, чач тарач болгонун, Грейдин мас абалын, кала берсе рояль ойноп, Пол Маккартнинин ырын созгон романтик Грейди көрөсүз. Жалпысынан кино жаратуучулар күйөрмандарын бийик кыялга жетелеп, укмуштуудай жашоону сүрөттөгөндү унутпаптыр. Кымбат баалуу унаалар, менчик тик учак, кеме менен дүйнө кезип саякаттоо, айтор кыялдагыдай жашоо баарыбызды бир сыйра миллионерлердин жашоосуна суктандырып алды.
Экинчи пландагы актёрлор да өз көйгөйлөрү менен тасмага салмак кошуп кызыгын арттырган. Фильмдин бул бөлүгүнө юмор кошулганы да тасмага өзгөчө түс берет. Грейдин кызыл бөлмөсүндөгү төшөк оюнунда керектелчү аспаптарын көрүп, көрөрман фильмдин уландысы тартылат деген ойдо калышы мүмкүн. Бирок Кристиан Грейдин ролун аткарган актёр Жейми Дорнан акыркы берген маегинде бестселлердин мындан аркы уландысы тартылбай турганын айткан. Андыктан “Грей мырзанын 50 кыры” дал ушул “Эркиндиктин 50 кыры” менен аяктаганы турат.
Эскертүү! “Эркиндиктин 50 кыры” тасмасын кинотеатрлардан 18 жаштан улуулар гана көрө алышат.
