Каза болгон Калмаматовдун ордуна келчү депутатка качан мандат бериле турганы белгисиз

Каза болгон Жыргалбек Калмаматовдун ордуна келчү депутатка качан мандат тапшырыла турганы дале белгисиз. Бул тууралуу бүгүн, 19-февралда SUPER.KG порталына Борбордук шайлоо комиссиясынын төрайымынын орун басары Абдыжапар Бекматов билдирди.

Анын айтымында, тиешелүү мамлекеттик органдар БШКнын суроо-талабына жооп бере элек. "Кыргызстан" партиясынын тизмесинде депутаттыкка кезекте турган жарандын соттолгон же соттолбогонун текшерүү жана башкаларды тактоо үчүн тиешелүү мамлекеттик органдарга суроо-талаптарды жөнөткөнбүз. Жооп келе элек. Мыйзам боюнча суроо-талапка 1 айдын ичинде жооп бериш керек. Азырынча 1 ай өтө элек", - деди Бекматов.

Буга чейин "Кыргызстан" фракциясынын катчылыгы партиянын тизмесинде кезекте турган Насыр Мусаев ооруп, чет мамлекетте жүргөнү боюнча кабарлаган.

19-январда БШК каза болгон Жыргалбек Калмаматовдун депутаттык ыйгарым укуктарын токтоткон. Жогорку Кеңештин "Кыргызстан" фракциясынан депутат Жыргалбек Калмаматов ушул жылдын 1-январында каза болгон. Аталган фракциянын катчылыгы "Кыргызстан" партиясынын тизмеси боюнча депутат болууга кезекте Насыр Мусаев турганын билдирген.

Автор: Жылдыз Джускембаева