Талас ОИИБи: "Денесине 20 жолу бычак сайылган жаран эркин күрөш боюнча машыктыруучу болуп эмгектенген эмес"

Таласта денесине 20 жолу бычак сайылган жаран эркин күрөш боюнча машыктыруучу болуп эмгектенген эмес. Бул тууралуу SUPER.KG порталына бүгүн, 27-февралда Талас ОИИБинин басма сөз катчысы Динара Сарногоева билдирди.

"Денесине 20 жолу бычак сайылып, ооруканага түшкөн 42 жаштагы жаран эркин күрөш боюнча машыктыруучу болуп эмгектенген эмес. Бирок анын спорттун бул түрү менен алектенип жүргөнү белгилүү болду", - дейт басма сөз катчы.

Андан сырткары, шектүү бул кылмышка жубайын кызгануудан улам барган деген маалымат такталып жатканын да кошумчалады.

"Мындай кадамга шектүү жубайын кызгануудан улам барган деген маалымат учурда такталып жатат. Буга чейин ал 1 жыл жубайы менен таарынышып, эки бөлөк жашап жүргөнү, жакында эле кайра жарашып чогуу жашай башташканы такталды. Кылмышты жасоого эмне себеп болгону тергөөнүн жыйынтыгы менен белгилүү болот", - дейт басма сөз катчы.

Айта кетсек, буга чейин Талас ОИИБинен 31 жаштагы адам 42 жаштагы жаранга 20 жолу бычак сайып салганын билдиришкен.