Быйыл Бишкектин көчөлөрүн 1 миллион 200 миң түп гүл көрккө бөлөйт

"Бишкек жашылдандыруу" ишканасы быйыл борбор калаанын көчөлөрүнө 1 миллион 200 миң түп гүл отургузат. Бул тууралуу Бишкек шаарынын мэриясынын басма сөз кызматы билдирди.

Маалыматка ылайык, февраль айынын башында ишкананын күнөсканаларында бир жылдык гүлдөрдүн 20дан ашуун түрлөрү жана 30дан ашуун сорттору отургузулган. Алардын ичинде катарантус, колеус, тагетес, далия, петуния, лобулярия, астра, вербена, цинерария, целозия жана агератум гүлдөрү бар.

Бишкек шаарындагы бир жылдык гүлдөр отургузулган жердин жалпы аянты 2 гектар 80 сотыхты, ал эми роза гүлдөрү отургузулган жердин аянты 3 гектар 70 сотыхты түзөт.

Автор: Айзада Тураркулова
Фото: Бишкек шаардык мэриясынын басма сөз кызматы