Бишкектин тургуну "аткаминердин жардамчысымын" деген кишиге жарым миллион сом берип алданып калды

Бишкек шаарынын тургунун 551 миң сомго алдап кетти деп шектелген жаран кармалды. Бул тууралуу Бишкек ШИИББинин басма сөз кызматынан билдиришти.

Маалыматка ылайык, 27-февралда Биринчи Май РИИБине шаар тургуну кайрылып, чала тааныш адамына чара көрүп берүүнү суранган. Ал адам аткаминердин жардамчысы экенин айтып, арыз ээсинин Казакстанда соттолгон байкесин экстрадициялап берем деп ири суммадагы акча алган.

Бул окуя боюнча Биринчи Май РИИБи "алдамчылык" беренеси менен кылмыш ишин козгоп, кылмышка шектүү катары Нарын облусунда туулган 39 жаштагы А.у.Р. аттуу жаранды кармашкан.

Учурда шектүү убактылуу кармоочу жайга киргизилип, тергөө иштери башталды.

Автор: Айсалкын Качкынбекова