Башкы прокуратура: "Айыл чарба министрлиги мыйзамсыз сатып жиберген бала бакча мамлекетке кайтарылды"

Айыл чарба, тамак-аш өнөр жайы жана мелиорация министрлиги 2012-жылы мыйзамсыз сатып жиберген бала бакча мамлекетке кайтарылды. Бул тууралуу Башкы прокуратуранын маалымат кызматынан кабарлашты.

Маалыматка таянсак, министрлик Чүй облусунун Москва районундагы "Алёнка" бала бакчасынын имаратын мыйзам бузуу жолу менен айыл чарба кооперативдердин бирине сатып жиберген. Ушул эле жылы прокуратура сатуу жана сатып алуунун мыйзамдуулугун аныктоо боюнча сотко кайрылып, бала бакча соттун чечими менен Предтеченск айыл өкмөтүнүн балансына алынган. Бирок 2014-жылы бала бакча кайрадан айыл өкмөттүн чечими менен ошол эле кооперативге өткөн.

Көзөмөлдөөчү органы кийлигишкенден кийин гана бала бакча кайрадан айыл өкмөттүн балансына өткөрүлүп берилди. Аталган бала бакчанын жалпы аянты 4 890 чарчы метрди түзүп, 5 миллион 221 миң сомго бааланган.

Автор: Жамалидин Парманкулов