Депутат "Ош базардагы" өрттүн чыгымдарын "Сейтек" базарынын ээси төлөп бериши керектигин айтты

Бүгүн, 15-мартта Жогорку Кеңештин жыйынында "Өнүгүү-Прогресс" фракциясынан депутат Зиядин Жамалдинов "Ош базардагы" өрттүн чыгымдарын "Сейтек" базарынын ээси төлөп бериши керектигин айтты.

Эл өкүлү өрттүн келип чыгышына себеп болгон адамдар табылбай, базар ээси жоопкерчиликтен сыртта калып жатканына токтолду.

"30-январда Бишкектеги "Ош базарынан" өрт чыкты. Бир канча күндөн кийин өрт кайра кайталанды. Өрттөн жабыр тарткан ишкерлер мага арыз менен кайрылды. Алардын айтымында, базардын ээси менен кандайдыр бир талаш-тартыш жаралып ошондон өрт чыгып жатыптыр. Базар болобу, соода түйүндөрү болобу видеокамераларды орнотуу керек. Жабыркагандардын арасында 300 миңден баштап, 1,5 миллион сомго чейин жоготууга учурагандар бар. Алардын салыгын, ижара акысын жана башка төлөмдөрүн төлөп жатышканын иликтеш керек. Эмне үчүн базардын ээси жоопкерчиликке тартылбай жатат? Базарда иштегендер ал жердеги күзөтчүлөргө да акча төлөшөт", - деди Жамалдинов.

Белгилей кетсек, 30-январда "Ош базарындагы" "Сейтек" базарынан өрт чыгып, 350 чарчы метр соода аянты күйүп кеткен. Март айынын башында "Ош базарындагы" өрт мурда өрттөнгөн "Сейтек" базарынан экинчи жолу өрт чыккан.

Автор: Мунарбек Жоргомов