Кыргыз жарандарына Корея Республикасынан келген эмгек келишимдеринин саны мурдагы жылдарга салыштырмалуу 30 пайызга көбөйдү

Кыргыз жарандарына Корея Республикасынан келген эмгек келишимдеринин саны мурдагы жылдарга салыштырмалуу 30 пайызга көбөйдү. Буга байланыштуу 15-мартта Кыргыз Республикасынын Кореядагы атайын жана толук ыйгарымдуу элчиси Кылычбек Султан Кореядагы K-BIZ орто жана чакан ишканалар ассоциациясынын аткаруучу директору И Жэ-уон менен жолугушту. Мындай маалыматты Кыргыз мамлекетинин Кореядагы элчилигинен кабарлашты.

Маалыматта айтылгандай, жолугушуу учурунда тараптар эмгек миграциясына байланыштуу маселерди талкуулашты. Ассоциациянын аткаруучу директору И Жэ-уон 2018-жылдын 1-чейрегинде Кыргыз Республикасынын жарандары үчүн эмгек келишимдери мурдагы жылдарга салыштырмалуу 30-40 пайызга көбүрөөк түзүлгөнүн маалымдады.

"Элчи Кылычбек Султан И Жэ-уон мырзага жана K-BIZ мекемесине Кыргыз жарандары үчүн жумуш табууда көрсөтүп жаткан көмөктөрү үчүн ыраазычылык билдирип, мындан ары да кызматташууну өнүктүрүү тууралуу келишишти", - деп айтылат элчиликтин маалыматында.

Айта кетсек, Кыргыз Республикасы Корея Республикасынын EPS программасына (чет өлкөлүк жумушчуларды жалдоого уруксат берүүчү систем) 2007-жылдан бери мүчө. Бул программага ылайык, 2018-жылдын 1-кварталында Кыргыз Республикасынын 116 жараны жумушка чакырылганы маалымдалган.

"Кореяга барып иштеп келүү үчүн эмне кылуу керек?" деген суроого бул шилтемеден жооп ала аласыз.

Автор: Кызжибек Раимова