Иранда дагы Телеграмды колдонууга тыюу салынды

Иранда Телеграм мессенжерин колдонууга тыюу салынды. Бул тууралуу бүгүн, 1-майда чет элдик басылмалар соттун өкүмүнө таянып жазып чыгышты.

Маалыматка ылайык, Иран соту Телеграмды жарандардын кайрылууларынан улам жапты. Мындан ары ирандыктар жергиликтүү Soroush социалдык тармагын пайдаланышмакчы. "Иран эли коопсуздук үчүн аталган социалдык тармакты өчүрдү. Буга чейин Иран бийлиги мамлекеттик кызматкерлерди чет элдик байланыш түйүндөрүнөн баш тартууга чакырган", - деп жазышат басылмалар.

Айта кетсек, кечээ, 30-апрелде Москва шаарында Телеграмдын жабылышына каршы нааразычылык акциясы өткөн. Орусиянын соту 13-апрелде өлкө аймагында аталган социалдык тармактын иштешине тыюу салган. Буга атайын кызмат менен Телеграмдын түзүүчүсү Павел Дуровдун пикир келишпестиги себеп болгон.

Маалымат катары: Иранда 45 миллион адам Телеграмды колдонот. 2017-жылдагы бийликке каршы өткөрүлгөн нааразычылык акциясынан кийин Телеграм 14 күнгө убактылуу жабылган.

Автор: Бектур Токтоноев