Түндө Бишкекте жаңы курулуп жаткан көп кабаттуу 2 имараттан өрт чыкты

21-майдан 22-майга караган түнү Бишкек шаарындагы жаңы курулуп жаткан көп кабаттуу 2 имараттан өрт чыккан. Бул тууралуу Өзгөчө кырдаалдар министрлигинин басма сөз кызматы кабарлады.

Маалыматка караганда, биринчи өрт тууралуу кабар 21-май күнү саат 21:40 чамасында келип түшкөн. Өрт өчүрүү кызматынан 3 бригада Аалы Токомбаев жана Сухэ-Батор көчөлөрүнүн кесилишине жакын жайгашкан жердеги курулуп жаткан көп кабаттуу имаратка келип, саат 22:30дар чамасында өрт курчоого алынган.

Саат 03:00дөр чамасында өрт өчүрүүчүлөргө 12-кичирайондогу курулуп жаткан көп кабаттуу курулуштан өрт чыккандыгы тууралуу маалымат келип түшкөн. Өрт өчүрүүчү 2 бригада тартылып, тилсиз жоо толук өчүрүлгөн.

Алдын ала айтылган маалыматтар боюнча, кырсыктан жабыркагандар болгон эмес.