Грузияда марихуананы пайдаланууга уруксат берилди

Грузиянын Конституциялык соту өлкө аймагында марихуананы пайдаланууга уруксат берди. Аталган чечим 30-июлда кабыл алынганын чет элдик басылмалар жазып чыгышты.

Маалыматка ылайык, буга чейин оппозициялык партиянын лидерлери марихуананы колдонууга карата коюлган чектөөлөрдү алып салуу боюнча сотко доо арыз менен кайрылган. Алар аталган чектөөлөр адамдын эркин өнүгүшүнө тоскоолдук кылат деген жүйө келтиришкен. Сотко доо арыз менен кайрылгандар "биз марихуана үчүн эмес, эркиндик үчүн ушундай кадамга бардык" деп баса белгилешкен. "Соттун чечимине ылайык, марихуананы 5-10 граммга чейин гана сактаса болот. Ири өлчөмдө сатып алууга тыюу салынды. Аталган талапты бузгандарга 14 миң сом өлчөмүндө административдик айып салынат. Марихуананы ири өлчөмдө сактаган учур катталса, кылмыш иши козголот", - деп жазылат маалыматта.

Расмий маалыматтар боюнча, Грузияда 10 миң жарандын 29у баңгизат колдонот. Анын ичинен 64 пайызы марихуана баңгизатын пайдаланат.

Айта кетсек, марихуананы пайдаланууга Чехия, Голландия, Бельгия, Улуу Британия, Швейцария, Австралия, АКШ жана Канада өлкөлөрү жарым жартылай жана толук түрдө уруксат берген.

Автор: Бектур Токтоноев