Дональд Трамп АКШнын президенттик шайлоосуна Орусия кийлигишти деген сынга пикирин билдирди

АКШнын лидери Дональд Трамп 2016-жылы өткөн президенттик шайлоого Орусия кийлигишпеген деп эсептейт. Бул тууралуу чет элдик басылмалар Ак Үйдүн маалымат катчысы Сара Сандерске шилтеме берүү менен жазып чыгышты.

Анын айтымында, Трамп АКШнын башкы прокурору Жефф Сешнске "Орусия президенттик шайлоого кийлигишти" деген шек боюнча жүргүзүлүп жаткан иликтөөнү токтотуу керек" деген пикирин билдирген. "Сандерс "президент баш прокурорго буйрук берген эмес, жөн гана пикирин айткан" деп баса белгиледи. Маалыматка ылайык, Трамп бул шектенүүнү токтотуу мезгили келди деп билдирген", - деп жазылат маалыматта.

Эске салсак, АКШнын президенттик шайлоосу 2016-жылдын ноябрь айында өткөн. Ошол учурда аталган мамлекеттик жогорку иш-чарага Орусия кийлигишип жатат деген сындар айтыла баштаган. Буга байланыштуу Трамптын шайлоо штабынын башчысы Пол Манафорт айыпталып, иш сотко чейин жеткен. Бирок аталган айыптоону Трамп да, Орусия да четке кагып келет.

Автор: Бектур Токтоноев