"Кыргыз почтасы" ишканасынын кызматкери кымырып алган 533 миң 100 сомду мамлекетке кайтарды

"Кыргыз почтасы" мамлекеттик ишканасынын Жалал-Абад шаардык филиалынын жооптуу кызматкери кымырып алган 533 миң 100 сомду мамлекетке кайтарды. Бул тууралуу SUPER.KG порталына Жалал-Абад ОИИБинин маалымат кызматынын ага инспектору Мыктыбек Турдубеков билдирди.

Маалыматка караганда, Жалал-Абад шаардык ички иштер бөлүмүнүн Жол кыймылынын коопсуздугунун көзөмөлдөө бөлүмүнүн кызматкерлери тарабынан 2017-жыл ичинде жол эрежелерин бузган 12 миң 125 учур катталып, тийиштүү протоколдор түзүлгөн. Айдоочулар тарабынан "Кыргыз почтасы" мамлекеттик ишканасынын Жалал-Абад шаардык филиалына 8 миң 174 айып протоколдун негизинде 5 миллион 25 миң 600 сом айып пул төлөнүп, калган протоколдор боюнча айып пулдар банктар жана башка төлөм алуучу мекемелер аркылуу мамлекетке төгүлгөн. Ошол төлөнгөн каражаттардын 533 миң 100 сомун аталган ишкананын Жалал-Абад шаардык филиалынын жооптуу кызматкерлери өздөрүнүн жеке кызыкчылыктарына пайдаланып жиберишкен. Натыйжада мамлекетке 533 миң 100 сомдук материалдык зыян келген.

Бул иш боюнча Жалал-Абад шаардык прокуратурасы тарабынан "ишенип берилген мүлктү ыйгарып алуу же жок кылуу", "шалаакылык" беренелери менен кылмыш иши козголуп, тергөө амалдарын жүргүзүү үчүн иш Жалал-Абад ШИИБинин тергөө бөлүмүнө жиберилген. Кылмыш ишинде шектүү катары суралып жаткан Б.М. аттуу жарандан мамлекетке келтирилген материалдык зыян катары 533 миң 100 сом өндүрүлгөн.

Күбө катары башка тийиштүү адамдар суралып, учурда тергөө улантылып жатат.

Бул каражат коррупциялык иштерден өндүрүлгөн каражаттар түшүүчү атайын эсепке которулган.

Автор: Бекболсун Молдояр уулу