5 мамлекет 1992-жылдан бери чечилбей келген Каспий деңизи маселеси боюнча бир чечимге келишти

Кечээ, 12-августта Казакстандын Актау шаарында бешинчи Каспий саммити өттү. Ага Казакстан, Азербайжан, Орусия, Иран жана Түркмөнстандын президенттери катышып, Каспий деңизинин укуктук макамын аныктай турган конвенцияга кол коюшту. Бул тууралуу чет элдик басылмалар жазышууда.

Кол коюлган документтин жобосу боюнча 5 мамлекет өздөрүнө тиешелүү аймактарды аныкташып, андан чийки затты өндүрүүгө укук алышкан. Бирок ага 5 өлкөнүн орток келишимде көрсөтүлгөн уруксаты бар болуп, ошондой эле экологиялык талаптар сакталууга тийиш экени белгиленген.

Укуктук документтин дагы бир негизги жобосу - кол койгон 5 мамлекеттин аскерлеринен сырткары башка өлкөлөрдүн аскер күчтөрүнүн жайгашуусуна тыюу салынган.

Айрым маалыматтарга караганда, Каспий деңизинде 50 миллион барель мунай запасы жана 9 триллион куб жаратылыш газынын запасы бар экени белгилүү. Деңизди бөлүү маселеси 1992-жылдан бери талкууланып келет.

Автор: Сталбек Абдижалил уулу