Орусиянын Сахалин облусундагы чатыры кулаган заводдун урандыларынын алдынан дагы бир Кыргыз жаранынын сөөгү табылды. Мындай маалыматты SUPER.KG порталына Сахалин облусундагы Кыргыз диаспорасынын төрагасы Эшимбек Толбаев билдирди.
"Изделип жаткан мекендешибиздин сөөгү бүгүн, 20-августта саат 16:30 чамасында табылды. Каза болгон эки мекендешибиз Ош облусунун Өзгөн районунун тургундары болгону аныкталды. Ал эми ооруканадагы жарандарыбыздын абалы канааттандырарлык. Маркумдардын сөөгүн бейшемби күнү жөнөтөлү деп жатабыз. Ага чейин документтерин топтошубуз керек", - деди Толбаев.
Эске салсак, кырсык 19-август күнү күндүз Орусиянын Сахалин облусундагы Поронайск районунда болгон. Анда 10 Кыргыз жараны иштеп жаткан эски заводдун чатыры түшүп кетип бир Кыргыз жараны каза болуп, 5 адам жаракат алган. Ал эми кырсыктан Тажикстандын бир жараны да каза болгону айтылган.