АКШнын Түркиядагы элчилигине ок чыгарган 2 адам кармалды

АКШнын Анкарадагы элчилигинин имаратына ок атууга шектелип 2 жаран кармалды. Бул тууралуу чет элдик басылмалар аталган мамлекеттин укук коргоо органдарына таянуу менен жазып чыгышты.

Маалыматка караганда, кармалгандардын жанынан элчиликке ок чыгарган тапанча жана автоунаа табылган.

"Шектүү катары 38 жана 39 жаштагы эки эркек киши кармалган. Алар Ахмет Челиктен жана Осман Гюндаш. Сурак учурунда экөөсү тең күнөөнү моюнуна алышкан", - деп айтылат маалыматта.

20-августта элчиликте болгон окуяда 6 ок атылып, анын үчөөсү күзөт кызматынын имаратына тийген.

Бул окуя Түркия менен АКШнын мамилеси солгундап турган учурга туш келген. Ушул жылдын 10-августунда АКШ Түркиядан алынып келген алюминий менен болотко бажы салыгын 20 пайыздан 50 пайызга чейин жогорулаткан. Дал ошол күнү Түркия лидери Режеп Тайип Эрдоган элди доллардан баш тартууга жана АКШдан чыгарылган электрондук товарларды сатып албоого чакырган. Мындан сырткары Кошмо Штаттардан алынып келген айрым товарларга бажы салыгын жогорулаткан.

Расмий Анкара бул окуяны Түркия менен АКШнын начарлаган мамилесинен пайдаланып жасалып жаткан "ачык чагым" деп баалаган.

Автор: Бектур Токтоноев