Мамэкотехинспекциянын басма сөз катчысы коррупцияга аралашкан деп 3 кызматкердин атын атады

Мамэкотехинспекциянын маалымат катчысы Анара Мамбеталиева "коррупцияга аралашкан" деп аталган мекеменин үч кызматкеринин атын атады. Мамбеталиеванын SUPER.KG'ге билдиргенине ылайык, ал 24-августта президент Жээнбековго видеокайрылуу жолдогон.

Анда: "Урматтуу президент Сооронбай Жээнбеков, мен 2016-жылдан бери Мамэкотехинспекциянын басма сөз кызматында эмгектенип келдим. 15-август күнү мени мыйзамсыз жумуштан алышты. Себеби буга чейин коррупциялык иштер боюнча бир нече жолу жетекчиликке кирип, коррупцияны жоюш үчүн ар бирибиз күрөшүү керектигин айтып, ураан көтөрүп чыккам.

Урматтуу өлкө башчы, сиз көтөрүп чыккан коррупциялык схеманы жокко чыгарып жана алар менен күрөшүү жарлыгыңызга арка-бел болуп, мен дагы коррупция менен күрөшүүнү чечтим эле. Буга чейин мамлекеттик экотехинспециянын коррупцияга байланышы бар деген кызматкерлердин атын жетекчиликке, тагыраак айтканда, Жолдош Жунушовго санап бергем. Мындан улам ал атайын комиссия түзгөн. Беш адамдан турган комиссия коррупцияга катыштыгы бар делген адамдарды текшерүүгө алган. Андан сырткары мени дагы текшеришкен. Иштеп жаткан комиссиядан маалымат алганымда алар аты аталган адамдардын ишинин таза эместигин айтышкан. Бирок жыйынтыгы так чыкпай акыры мени жумуштан алышты.

Урматтуу өлкө башчы, мен сиздин жарлыгыңызды колдоо менен коррупциялык ишке катыштыгы бар адамдардын бетин ачууга даярмын. Алар Мамэкотехинспекциянын статс-катчысы Таалай Асылбеков, кадр бөлүмүн жетектеген Самат Керимкулов жана финансы-каражат башкармалыгынын жетекчиси Гүлкайыр Жумашова. Мындан сырткары башка да адамдар бар.

Мына ушул кызматкерлер мамлекетке таандык акчалардын баарын туура эмес нукка пайдаланып жаткандыгы боюнча бир гана мен эмес, инспекциядагы бир нече кызматкерлер күбө болуп келет. Буга чейин жалгыз эмес элем, бирок мени берене менен жумуштан алгандан кийин артымдагы мага окшоп жабыр тартып келген инспекторлор ачык айтып чыгуудан коркушту. Урматуу президент, мен атап кеткен адамдардын ишмердүүлүгүн толугу менен текшерүүңүздү өтүнөм. Ошондой эле сизден акыйкат чечим күтөм. Мага коюлган берене алынып, кайра өзүмдүн жумушума иштөөнү суранам. Мен коррупциялык иштерге байланышы бар адамдарга эскертүү берип, бул боюнча иштин аягына чейин чыгам дегенден бери өмүрүмө коркунуч туулуп жатат. Ошондой эле инспекция тарабынан мага катара каралоо дагы болуп жатат. Президент, мен сизден суранарым мени гана эмес, үй-бүлөмө да коркунуч жаралууда. Андыктан өмүрүмдү жана коопсуздугумду коргоп берүүңүздөрдү өтүнөм", - деген ал кайрылуусунда.

Эске салсак, Мамэкотехинспекциянын басма сөз катчысы Анара Мамбеталиева коррупциялык иштерге каршы күрөшөм деп кызматынан кол жууганын айткан.

Мекеме анын кызматтан бошотулганын төмөнкүдөй түшүндүргөн. "Анара Мамбеталиева инспекциянын имаратында нааразычылык акциясын уюштурган. Мекеменин ичинде митинг өткөрүүгө мыйзам тыюу салгандыктан анын мындай аракети атайын комиссия тарабынан каралып, директор комиссиянын чечиминин негизинде аны 15-августта кызматтан алган", - дешкен Экотехинспекциядан.

SUPER.KG порталы бул боюнча аты аталган кызматкерлердин жана мекеменин пикирин угуп жарыялоого даяр.